Porti i Durrësit, takim pune në mbështetje të operatorëve të transportit (Publikuar dt. 29.07.2025)

Administrata doganore e Durrësit mori pjesë sot në një takim pune me përfaqësues të linjave kryesore të kontejnerëve, strukturave portuale dhe autoriteteve policore, me qëllim evidentimin dhe adresimin e problematikave që lidhen me fluksin në rritje të përpunimit të kontejnerëve në Portin e Durrësit, sidomos gjatë sezonit veror.

 
Gjatë takimit, Dogana Shqiptare shprehu mbështetje ndaj operatorëve privatë dhe kompanitë e transportit në shqetësimet e ngritura prej tyre. U theksua rëndësia e koordinimit institucional dhe u nënvizua bashkëpunimi i ngushtë me Autoritetin Portual dhe Policinë Kufitare, si një element kyç për funksionimin sa më të rregullt dhe efikas të procesit doganor.

 
Palët dakordësuan disa masa konkrete për të përmirësuar performancën operacionale në port dhe për të lehtësuar fluksin e përpunimit të kontejnerëve, duke synuar rritjen e konkurrueshmërisë së Portit të Durrësit në nivel rajonal.

 
Dogana Shqiptare mbetet e angazhuar të garantojë një shërbim sa më cilësor, të shpejtë dhe të sigurt për të gjithë përdoruesit e portit, nëpërmjet bashkëpunimit të hapur dhe të vazhdueshëm me të gjithë aktorët përkatës.