Udhëzues për qytetarët shqiptarë që udhëtojnë drejt Bashkimit Europian (Publikuar dt. 25.07.2025)

Drejtoria e Përgjithshme e Doganave informon qytetarët shqiptarë se, në momentin e hyrjes në territorin e Bashkimit Europian nga Shqipëria, zbatohen rregulla të përbashkëta të BE-së mbi sasinë e lejuar të mallrave të akcizës (duhan dhe alkool) që mund të transportohen për përdorim personal, pa detyrime doganore.

Duhan dhe produkte të duhanit

Qytetarët që udhëtojnë drejt vendeve të BE-së lejohen të transportojnë, pa pagesë taksash, vetëm njërën nga sasitë e mëposhtme:

Produkt
Sasia maksimale e lejuar
Cigare
200 copë
Cigarillos
100 copë
Puro
50 copë
Duhan   
250 gram
➡️ Mund të transportohet një kombinim proporcional, p.sh. 100 cigare + 125 g duhan.
📌 Kufiri aplikohet vetëm për persona mbi 18 vjeç.

Alkool dhe pije alkoolike

Personat mbi 18 vjeç mund të transportojnë pa detyrime doganore, deri në sasitë maksimale si më poshtë:

Kategoria e pijes
Sasia maksimale e lejuar
Pije alkoolike >22% (raki, whisky)
1 litër
ose pije ≤22% (verë e fortifikuar, shampanjë)
2 litra
Verë e zakonshme
4 litra
Birrë
16 litra
📌 Përdoruesit mund të zgjedhin 1 litër pije >22% ose 2 litra pije ≤22%, por jo të dyja.
Krahas kësaj, lejohen edhe verë dhe birrë si më sipër.

Kujdes!

Sasitë e mësipërme janë të vlefshme vetëm për përdorim personal.
Nëse udhëtarët mbajnë sasi më të mëdha, ata janë të detyruar të deklarojnë mallrat në doganë dhe të paguajnë taksat përkatëse sipas legjislacionit të vendit të BE-së ku hyjnë.
Mosrespektimi i rregullave mund të sjellë gjoba, konfiskim të mallrave apo ndalim hyrjeje në territor.