Drejtori i Përgjithshëm i Doganave takohet me Kryeministrin britanik në Portin e Durrësit  (Publikuar dt. 15/05/2025)

Drejtori i Përgjithshëm i Doganave Genti Gazheli, së bashku me ministrin e Brendshëm Ervin Hoxha mirëpritën sot në Portin e Durrësit Kryeministrin britanik Sh.T. Z. Keir Starmer në vizitën e parë të një kryeministri të Mbretërisë së Bashkuar në Shqipëri.

Doganat Shqiptare prej vitesh kanë një bashkëpunim të shkëlqyer me Ambasadën Britanike në Tiranë e në mënyrë të veçantë me Home Office International Operation dhe HMRC, në funksion të modernizimit të sistemeve të monitorimit të kufijve.

Një projekt i financuar nga Home Office International Operation ka mundësuar vendosjen e sistemeve të kamerave dhe leximit automatik të targave në pikat e kalimit kufitar, duke rritur efikasitetin e luftës së organeve ligjzbatuese në parandalimin e trafiqeve të paligjshme dhe ndalimin e dërgesave cash të padeklaruara sipas legjislacionit në fuqi.

Bashkëpunimi mes organeve ligjzbatuese në Portin e Durrësit në operacione të përbashkëta mes Administratës Doganore dhe Policisë së Shtetit e asistuar nga programet e Home Office dhe HMRC është vlerësuar si shembull në rajonin e Ballkanit Perëndimor.