Rritet bashkëpunimi doganor në rajonin e Adriatikut (Publikuar dt. 13/05/2025)

Administratat Doganore të Italisë, Shqipërisë, Kroacisë, Malit të Zi dhe Sllovenisë u takuan sot, në 13 Maj, në Trieste për të riafirmuar angazhimin e tyre për forcimin e bashkëpunimit rajonal në zonën e Adriatikut.

Duke pasur parasysh rolin në rritje të Detit Adriatik, si një korridor jetësor për tregtinë ndërkombëtare, veçanërisht midis Bashkimit Europian dhe vendeve fqinje dhe duke njohur sfidat e lidhura me të në operacionet doganore dhe kundër mashtrimit, Administratat pjesëmarrëse ranë dakord mbi nevojën për një koordinim më të thellë strategjik dhe operacional.

Duke pranuar rezultatet pozitive të arritura në kuadër të Projektit Adriacustoms të bashkëfinancuar nga BE në kuadër të Programit OLAF BE-Anti-Mashtrim dhe me qëllim rritjen e mëtejshme të shkëmbimit të ekspertizës dhe praktikave më të mira, Administratat doganore kanë miratuar dokumentin "Adriacustoms: Një Udhërrëfyes për Bashkëpunim të Përmirësuar në Rajonin e Adriatikut" si kornizë për bashkëpunimin e ardhshëm.

Objektivat kryesore të këtij angazhimi përfshijnë krijimin e një rrjeti ekspertësh për të mbështetur dialogun dhe koordinimin e strukturuar, planifikimin dhe kryerjen e operacioneve të përbashkëta në fushat me interes të përbashkët, shkëmbimin e informacionit për menaxhimin e përbashkët të riskut dhe profilizimin e përbashkët të riskut, harmonizimin e strategjive të kontrollit dhe përhapjen e praktikave më të mira, si dhe zhvillimin e programeve të avancuara të trajnimit për të forcuar kapacitetin institucional.

Administratat pjesëmarrëse synojnë gjithashtu të marrin në konsideratë përgatitjen e përbashkët të propozimeve të projekteve për dorëzim sipas instrumenteve përkatëse të financimit të BE-së.