Doganat marrëveshje me Policinë për lehtësimin e biznesit, skanimi do të bëhet vetëm në bazë të analizës së riskut (Publikuar dt. 09/04/2025)

Drejtori i Përgjithshëm i Doganave, Z. Genti Gazheli, së bashku me Kryeministrin e Shqipërisë, Z. Edi Rama, ministren e Shtetit për Sipërmarrjen dhe Klimën e Biznesit, Znj. Delina Ibrahimaj, Drejtorin e Përgjithshëm të Policisë së Shtetit Z. Ilir Proda, Drejtorin e Autoritetit Portual Durrës, Z. Kreshnik Bajraktari, si dhe kryetaren e Bashkisë Durrës, Znj. Emiriana Sako, zhvilluan ditën e martë pranë Degës Doganore Durrës një takim me përfaqësues të kompanive të transportit lidhur me ecurinë e procesit të skanimit në Portin e Durrësit dhe përafrimin e tij me standardet dhe praktikat më të mira të Bashkimit Europian.

Kryeministri, Z. Edi Rama, në fjalën e tij përpara përfaqësuesve të bizneseve të transportit, u shpreh se, “duke pasur parasysh kontributet tuaja, jo thjesht në ekonomi në tërësi, por kontributet tuaja si taksapagues dhe të gjitha bashkë ne do të fillojmë të operojmë jo më në bazë të kontrollit 100%, por kontrollit në bazë risku, pra nga 100 dalje nga porti, vetëm në 10 raste do të bëhet skanimi”. 

Nga ana e tij Drejtori i i Përgjithshëm i Doganave, Z. Genti Gazheli tha se Porti i Durrësit ka patur një rritje të madhe të numrit të kamionëve dhe konteinerëve që përpunohen pasi shërben si porta kryesore hyrëse për mallrat në Shqipëri dhe Kosovë, e gjithashtu për tranzite për Maqedoninë e Veriut, Malin e Zi, Serbinë e anasjelltas.

Në përfundim të këtij takimi, nga drejtori i përgjithshëm i Doganave, Z. Gent Gazheli dhe drejtori i përgjithshëm i Policisë së Shtetit, Z Ilir Proda u nënshkrua marrëveshja mes Drejtorisë së Përgjithshme të Doganave dhe Drejtorisë së Përgjithshme të Policisë së Shtetit për “Një shtesë në Urdhrin e përbashkët të dy drejtorive për miratimin e rregullave “Për bashkëpunimin për kryerjen e procedurave dhe veprimeve të përbashkëta të autoriteteve të Policisë dhe Autoriteteve doganore”.

Në bazë të kësaj marrëveshje palët dakordësohen që skanimi të bëhet vetëm në bazë të analizës së riskut, si dhe për krijimin e një njësie të përbashkët kontrolli Polici-Doganë në sheshin e trageteve, ashtu si aktualisht është edhe për sheshin e kontenierëve.

Marrëveshja e firmosur zgjidh përfundimisht problematikën e operatorëve ekonomikë, duke reduktuar në maksimum kostot e tyre, si dhe do të rrisë eficencën e parandalimit, zbulimit dhe goditjes së trafiqeve të paligjshme.