Drejtori i Përgjithshëm i Doganave pret Ambasadorin e Italisë në Shqipëri, Marco Alberti (Publikuar dt. 19/03/2025)

Drejtori i Përgjithshëm i Doganave, Z. Genti Gazheli, priti Sh.T. Z. Marco Alberti, Ambasador i Republikës së Italisë në Shqipëri. Gjatë këtij takimi u diskutua mbi rëndësinë e intensifikimit të marrëdhënieve bilaterale, me fokus të veçantë shkëmbimet tregtare mes dy vendeve tona.

Duke i shprehur mirënjohjen për mbështetjen e vazhdueshme dhe angazhimin e Italisë në rrugëtimin e Shqipërisë drejt integrimit europian, drejtori i Përgjithshëm i Doganave, Z. Genti Gazheli tha se vitet e fundit, marrëdhëniet e doganave shqiptare me Italinë kanë njohur një zhvillim të vrullshëm.

Për herë të parë pjesë e këtij bashkëpunimi u bë dhe Guardia di Finanza që u finalizua me nënshkrimin në 4 Prill të vitit të kaluar në Tiranë të Memorandumit të Mirëkuptimit për ngritjen e një Komisioni të Përbashkët Doganor Italo-Shqiptar, si një instrument për forcimin e lidhjeve, bashkëpunimin trepalësh dhe lehtësimin e dialogut ndërmjet Guardia di Finanza-s dhe Administratave Doganore të Italisë dhe Shqipërisë.

Implementimi i Plan Veprimit të këtij Memorandumi pati impakt të menjëhershëm në nxitjen e bashkëpunimit dhe shkëmbimin e ndërsjellë të informacionit, lehtësimin e komunikimit dhe bashkëpunimit për të luftuar kontrabandën, mashtrimin dhe aktivitete të tjera të paligjshme që lidhen me tregtinë ndërkombëtare, si dhe në zhvillimin dhe zbatimin e programeve të përbashkëta për të rritur aftësitë operacionale dhe teknologjike.

Ky takim i hap rrugën projekteve të reja të përbashkëta mes Administratave Doganore të Shqipërisë dhe Italisë dhe Guardia di Finanza, të cilat aktualisht janë në fazën e diskutimit për rinovimin e Plan Veprimit, si dhe të çuar akoma më tej bashkëpunimin mes dy anëve të Adriatikut.  

Dy bashkëbiseduesit vlerësuan rolin e veçantë që luajnë doganat e vendeve respektive, për lehtësimin dhe përshpejtimin e lëvizjes së pasagjerëve dhe mallrave, si dhe në luftën e përbashkët kundër trafiqeve të paligjshme.