Drejtues të Doganës Shqiptare priten në Ankara nga homologë të Doganës turke (Publikuar 18.02.2025)

Një delegacion i nivelit të lartë nga Dogana Shqiptare, kryesuar nga drejtuesi i Departamentit Operativo Hetimor, drejtori i Antikontrabandës dhe përfaqësuesi shqiptar në SELEC, u prit në Ankara nga zëvendësdrejtori i përgjithshëm i Doganës turke, si dhe drejtuesit e departamenteve të Antikontrabandës, Antidrogës dhe Inteligjencës. 

Gjatë takimit, palët diskutuan mbi strategjitë e përbashkëta për të luftuar kontrabandën dhe trafikun e paligjshëm, duke ndarë përvoja. Ky bashkëpunim është pjesë e përpjekjeve të vazhdueshme për të rritur efektivitetin e operacioneve doganore dhe për të siguruar një shkëmbim të shpejtë dhe efikas të informacionit midis dy vendeve.

Takimi në Ankara përforcon angazhimin e të dy vendeve për të intensifikuar përpjekjet e përbashkëta në luftën kundër kontrabandës dhe aktiviteteve të tjera të paligjshme. Ky takim pason disa operacione të suksesshme të përbashkëta në luftën kundër kontrabandës dhe synon forcimin e mëtejshëm të bashkëpunimit në këtë fushë.