FMN vlerëson pozitivisht Doganat, rritje të konsiderueshme e të ardhurave (Publikuar 13.02.2025)

Fondi Monetar Ndërkombëtar ka vlerësuar me nota të larta progresin e Administratës Doganore, që për vitin 2024, siç citon dhe FMN, “solli arritje të konsiderueshme në vjeljen e të ardhurave për mallrat e akcizës”.

Sipas raportit të asistencës teknike për Administratën Doganore, treguesit kryesorë përfshijnë:

•  Rritje 3% e peshës së produkteve të importuara
•  Rritje 9,3% e totalit të tatimeve të vjela
•  Rritje 8,1% e detyrimeve të akcizës, nxitur nga ndryshimet legjislative në nivelet e tatimit për produktet kryesore
•  Rritje 8,7% e mbledhjes së TVSH-së

Gjatë këtij misioni, eksperti punoi ngushtë me drejtuesit e DPD-së, përfshirë Z. Genti Gazheli, Drejtor i Përgjithshëm dhe pati diskutime edhe me zyrtarë të DPD-së të specializuar në analizën e risqeve, kontrollin aposteriori, operacionet e drejtorisë së akcizës etj.

Rezultatet e misionit synojnë të mbështesin drejtpërdrejtë përgatitjen e një plani realist për përmirësimin e përmbushjes së detyrimeve të akcizës për vitin 2025, për ta fuqizuar më tej kapacitetin DPD-së për të realizuar planin e të ardhurave dhe për të zbatuar në mënyrë efektive Strategjinë Afatmesme të të Ardhurave.

Ekspertët e FMN-së u shprehën mirënjohjen drejtuesve dhe punonjësve të DPD-së për angazhimin e tyre aktiv, për shkëmbimin e njohurive dhe për pyetjet konstruktive, çka pasqyron angazhimin e tyre të fortë për përmirësimin e administrimit doganor.

Sipas raportit, DPD ka bërë hapa të mëdhenj sa i takon përmirësimit të kuadrit të administrimit të risqeve, me përditësime vjetore të profileve të riskut dhe mbikëqyrjes strategjike nga ana e Komitetit të Menaxhimit të Riskut.