Dogana Shqiptare merr pjesë në trajnimin për fuqizimin e grave në uniformë, nismë e Ambasadës Britanike në Shqipëri (Publikuar 11.02.2025)

Dogana Shqiptare i është bashkuar Aleancës së Grave në Uniformë (WiUA) nismë e Ambasadës së Britanisë së Madhe në Shqipëri, duke marrë pjesë në tre seminare frymëzuese për punonjëset e agjencive ligjzbatuese nën uniformë organizuar nga Ministria e Brendshme dhe Ministria e Mbrojtjes së Mbretërisë së Bashkuar në bashkëpunim me WeWomen Albania.

Të mbajtura në Tiranë, Shkodër dhe Vlorë, në datat 3, 6 dhe 7 Shkurt 2025, këto seminare u ndoqën edhe nga koleget e Policisë së Shtetit, të Forcave të Armatosura Shqiptare dhe të Drejtorisë së Përgjithshme të Burgjeve. Tema kryesore e tyre ishte fuqizimi i grave në uniformë drejt barazisë më të madhe në të gjithë sektorët e sigurisë në Shqipëri, duke edukuar dhe fuqizuar ato për të shkëlqyer në rolet e tyre profesionale.

Administrata Doganore Shqiptare u përfaqësua nga specialiste me eksperiencë disa vjeçare, të cilat në fund të trajnimeve u pajisën edhe me certifikata në aftësi thelbësore si, “Komunikimi Efektiv”, apo “Aftësitë e Prezantimit”.

“Aleanca e grave në uniformë” është nismë e Ambasadës së Britanisë së Madhe në Shqipëri në bashkëpunim me Doganën Shqiptare, Ministrinë e Brendshme, Ministrinë e Mbrojtjes dhe Ministrinë e Drejtësisë.