Drejtori i Përgjithshëm i Doganave në ceremoninë e dhurimit të dy mjeteve lundruese nga Guardia di Finanza për Policinë Kufitare (Publikuar dt. 10/02/2025)

Drejtori i Përgjithshëm i Doganave, Z. Genti Gazheli, me ftesë të Ambasadës Italiane në Tiranë, mori pjesë sot në ceremoninë e dhurimit të dy mjeteve lundruese nga Guardia di Finanza italiane për Policinë Kufitare Shqiptare. 

 
Gjatë kësaj ceremonie, ku të pranishëm ishin dhe ministri i Mbrojtjes, Piro Vengu e drejtues të lartë të Policisë së Shtetit, asaj Kufitare dhe Guardia di Finanza, Drejtori Gazheli takoi Komandantin e Përgjithshëm të Guardia di Finanza-s, Andrea De Gennaro. 

Z. Gazheli falenderoi Komandantin e Përgjithshëm për asistencën shumë të vyer dhënë Administratës Doganore Shqiptare në kuadër të marrëveshjes së bashkëpunimit midis ADSH, Guardia di Finanza-s dhe Agjencisë së Doganave dhe Monopoleve Italiane firmosur në Prill 2024 në Tiranë, si dhe të projektit “Adriacustom”. 

Komandanti De Gennaro vlerësoi stadin e lartë të bashkëpunimit dhe shkëmbimit të informacionit midis administratave respektive. Të dy drejtuesit e lartë shprehën gatishmërinë për vijimin dhe intensifikimin e këtij bashkëpunimi me qëllimin e vetëm, për të bërë sa më të sigurta brigjet tona detare.