26 Janari - Dita Ndërkombëtare e Doganave (Publikuar dt. 27/01/2025)

Tematika e vitit 2025: “Efikasiteti, Siguria dhe Prosperiteti”

26 Janari shënon Ditën Ndërkombëtare të Doganave, një përvjetor për zyrtarët që punojnë çdo ditë për të garantuar efikasitetin e tregtisë globale, sigurinë në kufijtë kombëtarë dhe bashkëpunimin ndërkombëtar.

Këtë vit, fokus i veçantë po i kushtohet nevojës për t'i kthyer angazhimet në veprime të prekshme që avancojnë lehtësimin e tregtisë, garantojnë sigurinë dhe nxisin rritjen e qëndrueshme ekonomike, si pjesë e tematikes së OBD-së për vitin 2025: “Doganat në përmbushjen e angazhimit për efikasitet, siguri dhe prosperitet”, një slogan që fton administratat doganore të forcojnë rolin e tyre si një motor inovacioni dhe një shtyllë e tregtisë globale, duke krijuar një ekuilibër midis aktiviteteve të lehtësimit dhe kontrollit të tregtisë, që lejon procedura të shpejta dhe efikase të zhdoganimit, si dhe lufton trafiqet e paligjshme.

Efikasiteti, siguria dhe prosperiteti janë synime të përhershme globale, të arritura përmes përpjekjeve të patundura për të përmirësuar gjithçka bën dogana.

Efikasiteti mundësohet nga modernizimi i procedurave doganore dhe zhvillimi i shërbimeve digjitale, promovimi i operacioneve dhe mjeteve analitike të drejtuara nga të dhënat, përdorimi i pajisjeve të inspektimit dhe monitorimit, si dhe bashkëpunimi dhe angazhimi me entet publike dhe private.

Në fushën e sigurisë aktivitetet e Doganës synojnë forcimin e sigurisë së zinxhirit të furnizimit, parandalimin e lëvizjes së mallrave të paligjshme, luftimin e pastrimit të parave dhe rritjen e gatishmërisë ndaj krizave.

Prosperiteti, varet nga aftësia për të siguruar mbledhjen e drejtë të të ardhurave, për të nxitur inovacionin dhe sipërmarrjen, për të mbështetur zhvillimin e qëndrueshëm ekonomik si dhe për të krijuar politika, procedura dhe mjedise gjithëpërfshirëse që marrin parasysh nevojat e ndryshme të qytetarëve.

Shqipëria është anëtare e Organizatës Botërore të Doganave prej vitit 1992 dhe që prej asaj kohe merr pjesë aktivisht në takimet e Këshillit të OBD-së, komiteteve dhe nënkomiteteve, duke përfituar nga eksperiencat më të mira të vendeve të zhvilluara dhe duke i implementuar ato në sistemin tonë doganor.  Në bashkëpunim edhe me agjensi të tjera në kufi, Dogana Shqiptare luan një rol kryesor në lehtësimin e tregtisë, thjeshtimin, standardizimin dhe harmonizimin e procedurave doganore dhe sigurimin e kufijve.