Drejtori i Përgjithshëm i Doganave takim me përfaqësues të kompanisë operuese të aeroportit të Vlorës (Publikuar dt. 15/01/2025)

Në kuadër të ecurisë së procesit të ndërtimit dhe certifikimit të Aeroportit Ndërkombëtar të Vlorës, Drejtori i Përgjithshëm i Doganave Genti Gazheli priti ditën e sotme në një takim përfaqësues të kompanisë operuese të aeroportit të Vlorës, ekspertë të aeroportit të Mynihut, përfaqësues të Autoritetit të Aviacionit Civil, Albcontrol dhe të Policisë Kufitare. 

Gjatë diskutimeve në këtë takim, drejtori i Doganave u shpreh ndër të tjera se Aeroporti Ndërkombëtar i Vlorës, një nga projektet më të mëdha të qeverisë shqiptare për vitin 2025, do të jetë vazhdim i arritjeve të vendit tonë, si në fushën e turizmit, me shtimin e numrit të turistëve, ashtu edhe në zhvillimin që jep aeroporti për zonën përreth. 

“Dogana, duke qenë pjesë e funksionimit të organikës aeroportuale, ka tashmë të gjithë ekspertizën dhe përvojën e duhur për të kontribuuar me sukses në finalizimin sa më parë të këtij projekti. Ne, si Administratë Doganore, ju vëmë në dispozicion specialistët tanë më të mirë si në fushën e kontrolleve aeroportuale ashtu dhe në fushën e procedurave doganore,” u shpreh ndër të tjera drejtori i Përgjithshëm i Doganave, Genti Gazheli.