Drejtori i Doganave Genti Gazheli në takimin e parë Rajonal të BE dhe UNODC (Publikuar dt. 06/12/2024)

Drejtori i Përgjithshëm i Doganave Genti Gazheli mori pjesë në takimin e parë Rajonal të Komitetit Drejtues të Programit të Promovimit të Veprimit të Përbashkët të BE dhe UNODC (Zyra e Kombeve të Bashkuara për Drogën dhe Krimin).

Gjatë këtij takimi u diskutua mbi forcimin e sundimit të ligjit dhe qeverisjes së mirë përmes masave të efektshme të kontrollit kufitar në porte dhe aeroporte, ku autoritetet doganore kanë një rol të rëndësishëm krah policisë kufitare, partnerëve ndërkombëtarë dhe institucioneve të tjera ligjzbatuese.

“Bashkëpunimi dhe partneriteti mes nesh bazohet në një qëllim të përbashkët, të mbrojmë kufijtë tanë nga trafiqet e paligjshme dhe krimi i organizuar, duke mundësuar njëkohësisht që lëvizja e mallrave, shërbimeve dhe personave të jenë të sigurta dhe të pandërprera. Falë partneritetit me UNODC kemi arritur të përmirësojmë ndjeshëm mbikëqyrjen në portet dhe aeroportin tona, duke rritur kapacitetet në luftën ndaj trafikut të paligjshëm,” u shpreh ndër të tjera në fjalën e mbajtur në këtë Konferencë Drejtori i Përgjithshëm i Doganave, Genti Gazheli.

Ai tha gjithashtu se Dogana Shqiptare ka pasur rezultate konrete falë partneritetit me UNODC, si Programi i Kontrollit të Kontejnerëve falë të cilit u identifikuan dhe ndaluan e mbi 1.5 ton kokainë. Po ashtu, përmes Njësisë së Kontrollit të Ngarkesave Ajrore, është përmirësuar ndjeshëm mbikëqyrja në aeroporte, duke rritur kapacitete në luftën ndaj trafikut të paligjshëm përmes rrugëve ajrore.