Deklarata e Presidencës për Takimin e parë të Nivelit të Lartë të Drejtorëve të Përgjithshëm të Doganave të Ballkanit Perëndimor dhe Shteteve Anëtare të BE-së në Budapest (Publikuar dt. 18/11/2024)

Drejtori i Përgjithshëm i Doganave z. Genti Gazheli mori pjesë në Takimin e Nivelit të Lartë të Drejtorëve të Doganave të Ballkanit Perëndimor me vendet e BE-së, Budapest, Hungari. 

Gjatë fjalës së mbajtur në këtë takim ai u shpreh se procesi i integrimit europian dhe konvergjenca drejt Unionit Doganor po bëhen gjithmonë e më të prekshme për Shqipërinë falë edhe presidencës hungareze që i ka shtyrë gjërat shumë fort përpara.

“Jemi të ndërgjegjshëm se kemi hyrë në një proces intensiv të negociatave jo vetëm për kapitullin 29 “Bashkimi Doganor” por edhe të gjithë kapitujve të Tregut të Brendshëm dhe ky takim është një mundësi t’i thellojmë lidhjet midis Bashkimit Europian dhe Ballkanit Perëndimor, teksa vazhdojmë të ndërmarrim reforma konkrete ligjore për integrimin europian si projekt madhor politik,” tha mes të tjerash drejtori i Doganave Shqiptare, Genti Gazheli. 

Nga ana tjetër drejtori i Doganave theksoi se në funksion të tregtisë së lirë, nëpërmjet marrëveshjes CEFTA është rritur bashkëpunimi mes Administratave Doganore të vendeve të rajonit, sidomos në fushat e shkëmbimit të informacionit, lehtësimit të tregtisë dhe luftën kundër trafiqeve. 

“Në bashkëpunim dhe koordinimin e CEFTA kemi rezultate konkrete në procesin e njohjes reciproke të Operatorëve Ekonomikë të Autorizuar nga autoritetet doganore në të gjitha vendet Ballkanit Perëndimor, si një mundësi e madhe për zhvillimin e biznesit në tregun rajonal dhe në të ardhmen edhe më gjerë në tregun e përbashkët europian”, tha më tej ai.

Shqipëria me Kosovën, Maqedoninën e Veriut dhe Malin e Zi ka shembuj pozitivë me degë doganore nën regjimin e “One Stop Shop” si një mundësi për të përgjysmuar kohën e procesimit të deklaratave doganore, përshpejtuar lëvizjen dhe reduktuar kostot për bizneset. 

Po ashtu, është vendosur bashkëpunimi me Administratat Doganore të vendeve kufitare anëtare të BE-së, Italinë dhe Greqinë.

Në fillim të këtij viti është nënshkruar dhe po zbatohet Memorandumi mes Administratës Doganore Shqiptare, asaj Italiane dhe Guardia di Finanza për vënien në funksion të Komisionit të Përbashkët Doganor Italo-Shqiptar, si një instrument për forcimin e lidhjeve, shkëmbimin e informacionit dhe lehtësimin e dialogut ndërmjet Administratave Doganore të Italisë dhe Shqipërisë. 

Pjesëmarrësit në këtë takim diskutuan mbi ndarjen e praktikave më të mira të bashkëpunimit rajonal, si dhe vlerësimin e përgatitjes së procesit të integrimit në BE të Ballkanit Perëndimor.