Drejtori i Doganave Genti Gazheli në Takimin e Nivelit të Lartë të Drejtorëve të Doganave të Ballkanit Perëndimor me vendet e BE-së në Budapest (Publikuar dt. 18/11/2024)

Drejtori i Përgjithshëm i Doganave z. Genti Gazheli ndodhet sot në Takimin e Nivelit të Lartë të Drejtorëve të Doganave të Ballkanit Perëndimor me vendet e BE-së në Budapest, Hungari. 

Gjatë fjalës së mbajtur në këtë takim ai u shpreh se procesi i integrimit europian dhe konvergjenca drejt Unionit Doganor po bëhen gjithmonë e më të prekshme për Shqipërinë falë edhe presidencës hungareze që i ka shtyrë gjërat shumë fort përpara.

“Jemi të ndërgjegjshëm se kemi hyrë në një proces intensiv të negociatave jo vetëm për kapitullin 29 “Bashkimi Doganor” por edhe të gjithë kapitujve të Tregut të Brendshëm dhe ky takim është një mundësi t’i thellojmë lidhjet midis Bashkimit Evropian dhe Ballkanit Perëndimor, teksa vazhdojmë të ndërmarrim reforma konkrete ligjore për integrimin evropian si projekt madhor politik,” tha mes të tjerash drejtori i Doganave Shqiptare, Genti Gazheli. 

Pjesëmarrësit në këtë takim synojnë ndarjen e praktikave më të mira të bashkëpunimit rajonal, si dhe vlerësimin e përgatitjes së procesit të integrimit në BE të Ballkanit Perëndimor.