Drejtori i Përgjithshëm i Doganave, Genti Gazheli vizitë zyrtare në Doganën e Kosovës (Publikuar dt. 07/11/2024)

Drejtori i Përgjithshëm i Doganave të Shqipërisë, Z. Genti Gazheli, së bashku me një delegacion të përbërë nga drejtues të drejtorive kryesore të Administratës Doganore Shqiptare, zhvilloi një vizitë zyrtare në Doganën e Kosovës, ku u prit nga Drejtori i Përgjithshëm i Doganës së Kosovës, Z. Agron Llugaliu dhe ekipi i tij.

Vizita u përqendrua në forcimin e bashkëpunimit dhe shkëmbimin e përvojave ndërmjet dy institucioneve, si dhe përpjekjet e përbashkëta për lehtësimin e tregtisë mes dy vendeve.

Gjatë takimit, të dy delegacionet diskutuan mbi operacionet e zhdoganimit në Portin e Durrësit, ku përpjekjet për të përmirësuar procedurat dhe shërbimet kanë ndikuar ndjeshëm në rritjen e shkëmbimeve tregtare dhe kursimin e kohës për bizneset dhe qytetarët.

Po ashtu, u diskutua mbi bashkëpunimin në pikën e përbashkët kufitare Morinë-Vermicë, një hapësirë kyçe për shkëmbimet mes dy vendeve, ku teknologjitë dhe praktikat e fundit po zbatohen për të garantuar kalim të sigurt dhe efikas.

Drejtori i Përgjithshëm i Doganave të Shqipërisë, Z. Genti Gazheli gjatë fjalës së tij, ndër të tjera u shpreh se, “marrëdhëniet mes Administratave Doganore të Shqipërisë dhe Kosovës gjatë katër viteve të fundit kanë shënuar progres të qëndrueshëm dhe tashmë të konsoliduar në tre plane: planin ligjor, me miratimin e akteve që kanë hedhur themelet ligjore të bashkëpunimit; planin institucional, ku është realizuar ngritja e Komitetit të Përbashkët të Ekspertëve – KPE; si dhe Planin Operacional, me shkëmbime informacionesh në kohë reale nga strukturat e dy Administratave, kryesisht Procedurave Doganore, Riskut dhe IT.

Një pikë tjetër e rëndësishme e diskutimeve ishte procesi i integrimit europian, duke pasur parasysh fillimin e negociatave të Shqipërisë për anëtarësim në BE. Ekipi shqiptar ndau informacione të vlefshme me Doganën e Kosovës, të cilat priten të ndihmojnë në përgatitjet e mëtejshme drejt përmbushjes së standardeve europiane.

Në përfundim të takimit, Drejtorët e Përgjithshëm ranë dakord për të forcuar bashkëpunimin në të gjitha nivelet për të përmirësuar kapacitetet dhe për të adresuar sfidat e përbashkëta në fushën e doganave.

Ky partneritet i ngushtë synon të kontribuojë në lehtësimin e tregtisë dhe të mbështesë zhvillimin ekonomik të të dy vendeve.