Përmbyllet me sukses misioni i radhës i programit të bashkëpunimit mes Doganave të Shqipërisë, Italisë dhe Guardia di Finanza (Publikuar dt. 29/10/2024)

U përmbyll me sukses misioni i radhës i programit të aktiviteteve të bashkëpunimit ndërmjet Agjencisë së Doganave dhe Monopoleve të Italisë, Guardia di Finanza-s dhe Administratës Doganore të Shqipërisë, në vijim të Memorandumit të Bashkëpunimit mes dy vendeve nënshkruar në Tiranë.

Ekspertë nga ADM dhe nga Guardia di Finanza që operojnë në strukturat doganore të porteve të Barit e Brindizit për 5 ditë me radhë panë nga afër operacione specifike të menaxhimit të riskut të përqendruara në luftën kundër trafikut të paligjshëm në lidhje me valutën dhe pasagjerët në Portin e Vlorës dhe të Durrësit.

Shqipëria dhe Italia firmosën në Prill të këtij viti një Memorandum që parashikon intensifikimin e bashkëpunimit mes Doganave Shqiptare, Doganave Italiane dhe Guardia di Finanza dhe ndërmarrjen e nismave të përbashkëta në kuadër të përafrimit të procedurave dhe legjislacionit me standardet dhe kuadrin ligjor të Bashkimit Evropian.