Zhvillohet në Bruksel takimi i 15-të i Nënkomitetit për Tregtinë, Industrinë, Doganat dhe Tatimet (Publikuar dt. 24/10/2024)

Shqipëria dhe Bashkimi Europian zhvilluan në datat 23 dhe 24 tetor 2024 në Bruksel takimin e 15-të të Nënkomitetit “Për Tregtinë, Industrinë, Doganat dhe Tatimet”. Përfaqësues nga Komisioni Europian diskutuan zhvillimet më të fundit në këto fusha me autoritetet përkatëse shqiptare. Takimi u bashkëkryesua për BE-në nga z. Andrew Williams, Sekretar i Përhershëm për Nënkomitetin në DG NEAR të Komisionit Europian, ndërsa për Shqipërinë nga z. Genti Gazheli, Drejtor i Përgjithshëm i Doganave Shqiptare.

Gjatë këtij takimi dyditor, Drejtori i Përgjithshëm i Doganave, z. Genti Gazheli, u shpreh se Shqipëria ka një kuadër ligjor në shkallë tejet të lartë të përputhur me legjislacionin europian dhe mbetet thellësisht e angazhuar për përafrimin e plotë me “Acquis Communitaire” në fushën e doganave. Përfaqësuesit e Komisionit Europian vlerësuan pozitivisht progresin veçanërisht të Administratës Doganore Shqiptare sa i përket nivelit të përgatitjes ligjore, institucionale e administrative dhe planet e Shqipërisë për t’u bashkuar me Konventën e Përbashkët të Tranzitit.

Ekspertët e DG Taxud, z. Antonio Blanco dhe z. Karel de Greve, përgëzuan gjithashtu progresin që Dogana Shqiptare ka bërë në fushën e Operatorëve Ekonomikë të Autorizuar, duke rritur numrin në 16 AEO dhe theksuan se së shpejti do të ketë një shkëmbim reciprok nëpërmjet marrëveshjeve të reciprocitetit me vendet e CEFTA-s, pasi Shqipëria ka kaluar tashmë etapat e validimit dhe ka marrë një opinion pozitiv në këtë fushë.

Në takim u vlerësua gjithashtu fakti se, gjatë këtij viti, që përkon me çeljen e negociatave për grupkapitujt themelorë të integrimit të Shqipërisë në BE, Doganat kanë përparuar në lehtësimin e tregtisë, implementimin e Strategjisë së Biznesit të Administratës Doganore Shqiptare (2023-2027), si dhe dispozita të tjera të tilla, si ato për kontrollin doganor të mallrave të falsifikuara, apo ndihmën e ndërsjellë administrative në çështjet doganore.

Përfaqësuesi i OLAF, z. Paul Aleksander shprehu falenderime për përditësimin e pikës së kontaktit për MAA nga Dogana Shqiptare. Ai vlerësoi me nota të larta funksionimin me sukses të mekanizmit në fushën e asistencës së ndërsjellë administrative midis vendeve anëtare të BE-së dhe Shqipërisë, ndërsa theksoi se ky bashkëpunim i suksesshëm ishte përcjellë edhe nga vendet anëtare të BE-së. Ai vleresoi gjithashtu operacionet e kryera nga Dogana Shqiptare gjatë dy viteve të fundit, si edhe luftën në kontrabandën e cigareve.

Zhvillimi i Sistemit të Ri të Kompiuterizuar të Tranzitit - NCTS është një tjetër zhvillim pozitiv për Administratën Doganore Shqiptare. Dogana Shqiptare ka vijuar bashkëpunimin me partnerët me qëllim goditjen e shkeljeve doganore në bazë të marrëveshjeve dypalëshe me të gjitha doganat homologe. Në kuadër të bashkëpunimit ndërkombëtar ka vijuar koordinimi dhe bashkëpunimi i suksesshëm edhe me Qendrën për Zbatimin e Ligjit në Europën Juglindore SELEC. Dogana shqiptare është po ashtu pjesë e Projektit Adriacustoms e financuar nga OLAF.