Hapen negociatat e anëtarësimit në BE, Doganat drejtojnë “Kapitullin 29 - Bashkimi Doganor” (Publikuar dt. 15/10/2024)

Sot në Luksemburg u hapën negociatat e anëtarësimit të Shqipërisë në Bashkimin Europian, duke shënuar një ditë historike në agjendën europiane të vendit.

Administrata Doganore Shqiptare është e angazhuar në mënyrë të drejtëpërdrejtë në procesin e integrimit në drejtimin e “Kapitullit 29 - Bashkimi Doganor” dhe ndërkohë kontribuon në kapitujt e tjerë të reformës së tregut të brendshëm drejt standardeve të tregut të përbashkët europian.

Shqipëria ka një kuadër ligjor në shkallë tejet të lartë të përputhur me legjislacionin europian, duke përfshirë Kodin Doganor, Dispozitat Zbatuese të Kodit dhe legjislacionin doganor në tërësi për të mundësuar integrimin drejt bashkimit doganor.

Administrata Doganore ka marrë masat e duhura për pjesëmarrjen në Takimin e 15-të të Nënkomitetit Bashkimi Europian – Shqipëri “Për Tregtinë, Industrinë, Doganat dhe Tatimet”, që do të zhvillohet në Bruksel në datat 22 dhe 23 tetor 2024.