Vijon bashkëpunimi mes doganave shqiptare, italiane dhe Guardia di Financa (Publikuar dt. 02/10/2024)

Vazhdon me sukses bashkëpunimi doganor mes Shqipërisë dhe Italisë, i nisur pas Memorandumit të Bashkëpunimit ndërmjet Agjencisë së Doganave dhe Monopoleve (ADM), Guardia di Finanza dhe Administratës Doganore Shqiptare nënshkruar më 4 Prill 2024 në Tiranë.

Në kuadër të këtij bashkëpunimi, një delegacion shqiptar i Drejtorisë së Përgjithshme të Doganave zhvilloi një vizitë studimore në portin e Gioia Tauro në Itali.

Përfaqësuesit e Administratës Doganore Shqiptare janë mirëpritur nga zyrtarë dhe ekspertë të Agjencisë së Doganave dhe Monopoleve italiane, si dhe përfaqësues të Guardia di Financas.

Vizita studimore u fokusua në paraqitjen e funksionimit dhe organizimit të Portit të Gioia Tauro, inspektime fizike në terren për mallrat që tranzitohen në porte të ndryshme, si dhe në njohjen me kuadrin ligjor dhe procedurat për të luftuar trafikun e paligjshëm dhe narkotikët.

Shqipëria dhe Italia firmosën në Prill të këtij viti një memorandum që parashikon intensifikimin e bashkëpunimit mes Doganave Shqiptare, Doganave Italiane dhe Guardia di Finanza dhe ndërmarrjen e nismave të përbashkëta në kuadër të përafrimit të procedurave dhe legjislacionit me standardet dhe kuadrin ligjor të Bashkimit Evropian.