NJOFTIM PËR SHTYP (Publikuar dt.02/09/2024)

Nis në Durrës trajnimi i punonjësve të Doganës Shqiptare “Mbi kontrollin e anijeve”, Drejtori Gazheli: Bashkëpunim i shkëlqyer me Doganat Franceze

Në kuadër të asistencës së doganave franceze për Administratën Doganore Shqiptare nisi sot në ambientet e Komandës së Guardia di Finanza-s në Durrës trajnimi i punonjësve të Doganës Shqiptare “Mbi kontrollin e anijeve”.

Në ceremoninë çelëse të këtij trajnimi ishte i pranishëm Drejtori i Përgjithshëm i Doganave, Genti Gazheli, Atashehu Doganor Francez, Christophe Bergeon, si dhe Atashehu i Guardia di Finanza-s pranë ambasadës italiane në Tiranë Gianpiero Carrieri.

Drejtori Gazheli vlerësoi bashkëpunimin me Administratën Doganore Franceze, e cila daton para shumë vitesh dhe shtrihet pothuajse në të gjitha fushat e veprimtarisë së Administratës Doganore: legjislative, ligji i akcizës, aposteriori dhe NCTS në kuadër të projekteve IPA, si dhe trajnimet e strukturave tona ligjzbatuese.

“Përfitoj nga rasti të vlerësoj me superlativa bashkëpunimin me Postin e Atasheut Doganor Francez dhe në veçanti gjatë periudhës që ky post drejtohet nga Z. Bergeon, ku intensiteti i asistencës së ndërsjellë ka arritur nivele të konsiderueshme,” tha ndër të tjera ai.

Drejtori i Doganave evidentoi faktin se ky trajnim është mjaft i rëndësishëm edhe për faktin se tregtia më e madhe e vendit tonë (import-eksport) realizohet në rrugë detare, kryesisht ndërmjet Portit të Durrësit, Porto Romanos, Portit MBM, si dhe Portit të Vlorës.

Ai u shprehu homologëve gadishmërinë e Administratës Doganore Shqiptare për çuarjen më tej të bashkëpunimit dhe asistencës së ndërsjellë në të gjitha fushat e veprimtarisë doganore e në veçanti për mbikëqyrjen dhe kontrollin doganor në transportin detar.