Njoftim për shtyp (Publikuar dt. 18/06/2024)

Mbi nënshkrimin e Memorandumit “Mbi krijimin e Observatorit të Logjistikës Detare dhe Zinxhirëve të Furnizimit”

 Ditën e enjte, në datë 13 qershor 2024, nën kujdesin e veçantë të zv/kryeministres dhe ministres së Infrastrukturës dhe Energjisë, znj. Belinda Balluku u nënshkrua në Durrës memorandumi  “Mbi krijimin e Observatorit të Logjistikës Detare dhe Zinxhirëve të Furnizimit”.

Observatori do të shërbejë si një platformë ndërinstitucionale digjitale për mbledhjen, analizën dhe interpretimin e të dhënave mbi logjistikën detare dhe zinxhirët e furnizimit në Shqipëri.

Nga ana e Drejtorisë së Përgjithshme të Doganave, Memorandumi u nënshkrua nga Drejtori i Përgjithshëm, z. Genti Gazheli.

Sipas memorandumit, Drejtoria e Përgjithshme e Doganave anagazhohet të furnizojë me të dhëna statistikore mbi vëllimet tregtare të mallrave të importuara/eksportuara/tranzit përmes porteve shqiptare, si dhe të ndihmojë në identifikimin e vendeve të origjinës dhe destinacionit, vlerës dhe të dhëna të tjera publike dhe të dobishme për qëllimet studimore të observatorit.