Drejtori i Doganave Genti Gazheli në takimin vjetor të rajoneve të ECA për mbrojtjen e shtresës së Ozonit: Shqipëria ka në zbatim një bazë të plotë ligjore të Protokollit të Montrealit (Publikuar dt. 23/04/2024)

Drejtori i Përgjithshëm i Doganave, Genti Gazheli, mori pjesë sot në takimin teknik vjetor për rajonin e Europës dhe Azisë mbi Zbatimin e Protokollit të Montrealit për mbrojtjen e shtresës së Ozonit, organizuar në Tiranë nga Programi i Mjedisit të Kombeve të Bashkuara (UNEP) dhe Ministria e Turizmit dhe Mjedisit e Shqipërisë.

Gjatë fjalës së mbajtur në këtë takim ai u shpreh se, Shqipëria ka në zbatim një bazë të plotë ligjore të Protokollit të Montrealit.

Nga ana tjetër Gazheli tha se në sistemin doganor janë krijuar dhe përditësohen rregullisht profilet e riskut për substancat ozonholluese, si dhe për produktet dhe pajisjet që i përmbajnë ato, me qëllim zbatimin e ndalimeve dhe kufizimeve.

Drejtoria e Përgjithshme e Doganave bashkëpunon me Ministrinë e Turizmit dhe Mjedisit dhe Njësinë Kombëtare të Ozonit për përmirësimin e cilësisë së kontrolleve nëpërmjet shkëmbimit të informaconit dhe sigurimin e pajisjeve funksionale për identifikimin e substancave ozonholluese.

Po ashtu Drejtoria e Përgjithshme e Doganave në bashkëpunim edhe me Njësinë Kombëtare të Ozonit zhvillon trajnime të përvitshme për personelin doganor mbi detektimin e substancave ozonholluese dhe përdorimin e pajisjeve identifikuese të këtyre substancave.