“INTERREG 2021-2027”, rritet bashkëpunimi doganor Greqi – Shqipëri (Publikuar dt. 18/04/2024)

Në 17 prill 2024, në kuadër të bashkëpunimit ndërkufitar Greqi - Shqipëri dhe të finalizimit me sukses të Projektit “Lëvizshmëria në Bregdetin Jonian - COMOBILON” pjesë e Programit Interreg IPA Cross-border Cooperation “Greqi – Shqipëri 2014-2020”, u zhvillua një vizitë inspektimi në Pikën Kufitare Qafë Botë për rezultatet e implimentimit të këtij projekti, ku morën pjesë përfaqësues nga Komisioni Europian, Autoriteti Menaxhues “INTERREG 2021-2027”, Sekretariati i Përbashkët i Programit Interreg VI-A IPA III CBC “Greqi-Shqipëri 2021-2027”, Agjencia Shtetërore e Programimit Strategjik dhe Koordinimit të Ndihmës në Shqipëri (SASPAC), Dogana Shqiptare dhe Policia e Shtetit.

Zbatimi i këtij projekti bëri të mundur përmbushjen e objektivave:

·        përmirësimi i konektivitetit dhe aksesueshmërisë në zonën ndërkufitare të Greqisë dhe Shqipërisë.

·        rritja e modaliteteve të transportit, përmes lehtësimit të ndërlidhjes së porteve të Igumenicës, Sarandës, Vlorës dhe Aeroportit të Janinës, Kastorisë dhe Tiranës.

·        përmirësimi i lëvizjes së njerëzve dhe qarkullimit të mallrave në zonën kufitare Greqi - Shqipëri.

·        mbështetja e fluksit të trafikut në zonën e kufirit, i cili është në rritje të vazhdueshme për shkak të aktivitetit intensiv të bizneseve dhe rritjes së fluksit turistik të vërejtur kryesisht në verë.

·        përmirësimi i cilësisë së jetesës së popullatës për shkak të rrugës dhe sigurisë më të mirë.