ADSH pjesë e rëndësishme e institucioneve shqiptare në procesin e integrimit në BE (Publikuar dt. 25/10/2023)

Shqipëria dhe Bashkimi Europian zhvilluan në Bruksel takimin bilateral mbi Kapitullin 33 “Dispozitat financiare  dhe buxhetore”, në kuadër të integrimit.

Përfaqësues të Administratës Doganore ishin pjesë e delegacionit  zyrtar në takimin bilateral që u zhvillua në Bruksel, në 25 Tetor, duke dhënë një kontribut në rëndësishëm në këtë proces.  

Gjatë këtij takimi pala shqiptare raportoi për nivelin e përgatitjes ligjore, institucionale e administrative për Kapitullin 33, i cili mbulon rregullat në lidhje me burimet financiare të nevojshme për financimin e buxhetit të BE-së pas anëtarësimit. Këto burime përbëhen nga:

⁃ Të ardhura nga burimet e veta tradicionale (të ardhura nga detyrimet doganore të cilat vendosen nga shtetet anëtare në emër të BE-së dhe nga tatimi mbi vlerën e shtuar);

⁃ Të ardhura nga burime bazuar në nivelin e të ardhurave kombëtare bruto (GNI) të çdo shteti anëtar.

⁃ Të ardhura nga burimet e veta plastike, i prezantuar nga 1 janari 2021

Ky kapitull mbulon rregullat në lidhje me burimet financiare të nevojshme për financimin e buxhetit të BE-së (“burimet e BE-së).  Shtetet Anëtare duhet të kenë kapacitetet e duhura administrative për të bashkërenduar në mënyrë të përshtatshme dhe për të siguruar llogaritjen, mbledhjen, pagesën dhe kontrollin e  burimeve të BE-së. Acquis në këtë fushë është drejtpërdrejt i zbatueshëm dhe nuk kërkon transpozim në ligjin kombëtar.