Presidentja e Kosovës Vjosa Osmani viziton Doganën e Durrësit (Publikuar dt. 08/09/2023)

Lehtësimi procedurave doganore, zhdoganimi direkt në Portin e Durrësit, realizimi në kohë rekord i tranzitit të eksporteve dhe importeve në doganën e Morinës, shkëmbimi informacioneve mes dy administratave doganore dhe ndjekja e zbatimit të marrëveshjeve/protokolleve 📃janë tashmë pjesë e punës së përditshme në Administratën Doganore Shqiptare.

Në kuadër të vizites zyrtare 2 ditore që Presidentja e Republikës së Kosovës, Sh.S. Znj. Vjosa Osmani Sadriu, zhvilloi në vendin tonë, një ndër ndalesat e saj ishte dhe Pika e Doganës së Kosovës në Portin e Durrësit.

Drejtori i Përgjithshëm i Doganave, Genti Gazheli, e informoi Presidenten Osmani, se vetëm gjatë këtij viti janë  rritur me 50% mallrat dhe kontenierët që zhdoganohen në Durrës dhe kanë destinacion tregun kosovar. Kjo falë lehtësimit të procedurave doganore  dhe shërbimit të shpejtë ndaj biznesit.

Shqipëria ka një bilanc tregtar pozitiv me Kosovën. Për vitin 2022 vlera e importeve arriti në 16.2. miliard lekë, ndërsa vlera e eksporteve në 37.7 miliard lekë, ndërsa volumi i importeve ishte 172.8 mijë ton, volumi i eksporteve arriti në 707 mijë ton.