Integrimi në BE: Zhvillohet në Bruksel takimi bilateral mbi Bashkimin Doganor (Publikuar dt. 15/06/2023)

Lehtësimi i tregtisë sidomos nëpërmjet thjeshtimit të procedurave dhe krijimi i një klime të favorshme të biznesit tashmë është një ndër prioritetet e Qeverisë Shqiptare.

Shqipëria dhe Bashkimi Europian zhvilluan në Bruksel takimin bilateral mbi Kapitullin 29 “Bashkimi Doganor”, në kuadër të integrimit.

Delegacioni i Shqipërisë kryesohej nga Negociatorja e kët kapitulli Zv. Ministre e Financave dhe Ekonomisë, Vasilika Vjero, e cila në fjalën e saj theksoi rëndësinë që ka bashkimi doganor në përmbushjen e të gjitha detyrimeve për integrimin e plotë të vendit tonë në Bashkimin Europian, si një objektiv i rëndësishëm strategjik i Qeverisë.

Drejtori i Përgjithshëm i Doganave, Genti Gazheli, në prezantimin e tij, u shpreh se Administrata Doganore është shumë e angazhuar në rritjen e standardeve të shërbimeve ndaj qytetarëve dhe biznesit në partneritet me Bashkimin Evropian dhe ky proces do të jetë "skaneri më i mirë" për të vendosur piketat kryesore të përafrimit të legjislacioni dhe ajo që është më e rëndësishme, Zbatimi i Ligjit në Shërbimin Doganor duhet të jetë një partner serioz dhe i qëndrueshëm i Shteteve Anëtare të BE.

Acquis i bashkimit doganor përbëhet pothuajse ekskluzivisht nga legjislacion, i cili është drejtpërdrejt i detyrueshëm për Shtetet Anëtare. Ai përfshin Kodin Doganor të BE-së dhe dispozitat e tij zbatuese,  nomenklaturën e kombinuar, tarifën e përbashkët doganore dhe dispozitat për klasifikimin e tarifave, lehtësimin e taksës doganore, pezullimet e detyrimeve dhe kuotat e caktuara të tarifave, si dhe dispozita të tjera të tilla si ato për kontrollin doganor të mallrave të falsifikuara dhe pirate, lëndët e para për prodhimin e drogave , eksportimin e mallrave kulturore si dhe për ndihmën e ndërsjellë administrative në çështjet doganore dhe të tranzitit.