Projekti i Bankës Botërore vlerëson pozitivisht përshpejtimin e procedurave doganore me Kosovën (Publikuar dt. 17/03/2023)

Një mision i ekspertëve të projektit të Bankës Botërore “Mbi Mbështetjen e Lehtësimit të Tregtisë” (World Bank’s Trade Facilitation Support Project (TFSP II) zhvilloi një vizitë studimore dhe disa takime në degën Doganore të Morinës(Kukës) me përfaqësues të Doganave, Policisë Kufitare dhe AKU-së. 

Drejtuesja e projektit znj. Violane Konar-Leacy dhe eksperti i Doganave z.Colin Gazeley, vlerësoi progresin e dukshëm të procedurave doganore në pikën e përbashkët me Kosovën Morinë-Vermicë sa i përket digjitalizimit të shërbimeve doganore dhe rritjen e numrit të Operatorëve Ekonomikë të Autorizuar.

Ekspertët e projektit panë nga afër procedurat doganore dhe reduktimin e kohës (rekord më pak se 30 sekonda) të procesimit të dekaratave import, eksport dhe transit nga Kosova drejt tregjeve ndërkombëtare nga Morina nëpërmjet Doganës së Portit të Durrësit.

Një nga komponentët kryesorë të projektit TFSP II është mbështetja e Bankës Botërore për vendet e Ballkanit Perendimor duke zhvilluar procedurat e kontrollit të përbashkët doganor me një ndalesë(one-stop shop) dhe sipas Traktatit të Komunitetit të Transportit pika doganore Shqipëri-Kosovë(Morina/Vermica) është ndër prioritaret për këtë lehtësim.

Prej datës 1 tetor 2022, Dogana e Kosovës ka nisur në Portin e Durrësit zhdoganimin direkt të mallrave që kanë destinacion Kosovën duke i mundësuar ekonomisë së Kosovës që praktikisht të ketë qasje në det dhe duke lehtësuar kështu depërtimin e bizneseve kosovare në eksportet në tregjet ndërkombëtare drejt BE, SHBA-së etj..