Drejtori i Përgjithshëm i Doganave merr pjesë në takimin e nivelit të lartë me Organizatën Botërore të Doganave dhe Bankën Botërore (Publikuar dt. 09/03/2023)

Me ftesë të Drejtorisë së Përgjithshme të Doganave të Maqedonisë së Veriut dhe Grupit të Bankës Botërore, Drejtori i Përgjithshëm i Doganave z. Genti Gazheli mori pjesë sot në takimin e nivelit të lartë “Drejt Gjeneratës së re të Bashkëpunimit Rajonal nëpërmjet digitalizimit”.

Në fjalën e tij z. Gazheli theksoi se “për t’ju përgjigjur sfidave të pandemisë gjatë dy viteve të fundit prioritet i Administratës Doganore ka qënë digjitalizimi dhe modernizimi, mirëmenaxhimi dhe shërbimi 24/7 për të siguruar zinxhirët e furnizimit të konsumatorëve dhe biznesit, si dhe bashkëpunimi i ngushtë me Orgaizatën Botërore të Doganave, BB, FMN etj”.

Rezultatet e digjitalizimit janë të prekshme sot për operatorët ekonomikë në uljen e kostove dhe kohës së zhdoganimit të mallrave të konfirmuar edhe nga studimi i fundit i Bankës Botërore “Time release study in Albania” ku vlerësohet se “koha mesatare e procedurave të importit, tranzitit dhe eksportit është reduktuar ndjeshëm dhe se kjo është një histori suksesi e Administratës Doganore”.

Administrata Doganore ka luajtur rol kryesor edhe në kuadër të projektit të Bankës Botërore “Lehtësimi i tregtisë dhe transportit në Ballkanin perendimor” që në fazën e parë përfshin Shqipërinë, Maqedoninë e veriut dhe Serbinë.

Gjatë muajit shkurt 2023 janë zhvilluar takimet me grupet e interesit me fokus prezantimin e projektit të Dritares së Vetme për të gjitha shërbimet (Single Window) dhe zbatimi i projektit synon reduktimin e kostos së tregtisë dhe transportit në rajon.

Gjithashtu z. Gazheli gjatë këtij aktiviteti të nivelit të lartë zhvilloi takime me Sekretarin e Përgjithshëm të OBD, z Kunio Mikuriya, Zv.kryeministrin e Maqedonisë së Veriut z. Fatmir Bytyqi, Ministrin e Financave z. Fatmir Besimi, përfaqësuesin e Bankës Botërore z. Massimiliano Paolucci dhe drejtorët e përgjithshëm të Doganave të vendeve të rajonit.