Dhoma Amerikane e Tregtisë vlerëson bashkëpunimin me Doganat në Forumin e Biznesit për Vitin 2022 (Publikuar dt. 29/06/2022)

Me ftesë të Dhomës Amerikane të Tregtisë, Drejtoria e Përgjithshme e Doganave diskutoi sot në një forum biznesi aspektet kryesore të lehtësimit të procedurave doganore, uljes së kohës së zhdoganimit, përmirësimin e klimës së biznesit dhe rezultatet e pyetësorit për raportet mes bzinesit dhe doganave.
Në fjalën e tij, Presidenti i Dhomës Amerikane të Tregtisë, Enio Jaço u shpreh se “është e qartë që ne kemi pasur një bashkëpunim që në thelb ka komunikim dhe mendje të hapur për çështjet e rëndësishme. Koordinimi dhe komunikimi me institucionin e doganave ka qenë shumë i mire”.
Drejtori i Përgjithshëm i Doganave Genti Gazheli u shpreh se “me mbajtjen e premtimit që Ju dhashe Forumin e vitit të kaluar, dëshiroj të theksoj se Administrata Doganore ka qenë e hapur për rekomandimet tuaja lidhur me përmirësimin e vazhdueshëm të shërbimeve doganore”.
Sipas Gazhelit, një Pyetësor i draftuar në bashkëpunim edhe me AmCham, ju është shpërndarë të gjitha shoqatave dhe organatave të biznesit dhe është publikuar në faqen e internetit të DP Doganave. Rezultatet e Pyetësorit tregojnë se kemi rritur klimën e besimit te biznesit te Doganat dhe kjo u konfirmua edhe nga deklarimi i Sekretarit të Përgjithshëm të OBD, z. Mikuria që vizitoi Shqipërinë në mars 2022.
Rezultatet e Pyetësorit të zhvilluar me bizneset tregojnë se: mbi 63 % e tyre i konsiderojnë raportet shumë të mirë dhe 30.2 % mirë ndërkohë që rreth 67 % e bizneseve mendojnë se klima është përmirësuar gjatë vitit 2021 ndërkohë që lidhur me pyetjen se si e vlerësojnë etikën e punës në Dogana 57.5 % shprehen “shumë mirë” dhe 33.8 % “mirë”.
Për herë të parë, Doganat kanë miratuar vitin e kaluar statusin për 8 Operatorë të Autorizuar Ekonomikë-AEO, kryesisht nga bizneset më të konsoliduara dhe më korrekte në marrëdhënien me Administratën Doganore, ndërkohë që po vlerësohen 9 aplikime të tjera.
Përmirësime të shërbimeve ndaj biznesit në reduktimin e kohës dhe kostove të shërbimit janë certifikuar qartësisht edhe në raportin e Bankës Botërore (IFC, Prill 2022). Sipas studimit, në vitin 2021 krahasuar me vitin 2018, në Portin e Durrësit, koha mesatare e çlirimit të mallrave është shkurtuar me 26%; në zyrat doganore kufitare, koha mesatare e çlirimit të mallrave është shkurtuar me 20%. në zyrat doganore të brendshme, koha mesatare e çlirimit të mallrave është shkurtuar me 74%.
Dogana është përfshirë në një proces të thellimit dhe zgjerimit të digitalizimit. Bizneset sot deklarojnë në sistemin informatik të doganës pa shkresa (“paperless”), marrin autorizime/lehtësime/vertëtime online nëpërmjet Platformës e-Albania, nuk paraqiten më pranë sporteleve/zyrave të autoritetit doganor për depozitim kërkesash/dokumentash, proçes i cili merrte minimalisht 2 ditë, një për hyrjen e një për daljen e shkresës.
Aktualisht Drejtoria e Përgjithshme e Doganave ofron 34 shërbime online dhe 4 aplikacione(nga muaji Mars 2022 “Statusi i deklaratës tranzit”, “Statusi deklaratës import-eksport”, “Gjendjen e llogarisë parapraguese” si dhe “Konfirmimin e pagesave të kryera nga subjektet në llogaritë e doganës”), ndërkohë që brenda vitit të gjitha shërbimet do të jenë online.
Për periudhën Janar – Maj 2022, janë shqyrtuar gjithsej 4240 aplikime online nga te cilat jane miratuar 3440(mbi 81 % e aplikimeve), refuzuar 303, kthyer për plotësim 403 dhe janë në proces shqyrtimi 94. Nga një analize e kryer nga strukturat e DPD dhe krahasimi me periudhën kur këto shërbime nuk ofroheshin online, rezulton që : Për vitin 2021 janë dhënë 5415 autorizime me një kohë të kursyer prej 10.830 ditë dhe Për Janar-Maj 2022 janë dhënë 3932 autorizime me një kohë të kursyer prej 7.864 ditë.
Drejtori i Përgjithshëm i Doganave ftoi bizneset të aplikonit sa më shumë për shërbimet online/aplikacionet e Doganave si dhe për statusin e AEO, statusin e “Eksportuesit të miratuar”, për të marë përfitimet e sistemit të dixhitalizuar në uljen e kohës dhe kostove të biznesit.