Gazheli në Konferencën Kombëtare Antikorrupsion: Dogana digjitale ka ulur kohën e zhdoganimit dhe kostot e biznesit (Publikuar dt. 15/06/2022)

Dogana shqiptare  është pjesë integrale e revolucionit digjital, që ka ndikuar në shërbime eficiente,  ka ulur  kohën e zhdoganimit dhe kostot e  biznesit

Drejtori i Përgjithshëm i Doganave Gent Gazheli, i pranishëm në punimet e ditës së tretë të Konferencës së parë Kombëtare Antikorrupsion , Gazheli tha se, “lufta kundër korrupsionit është dhe mbetet një nga sfidat kryesore të administratës tonë”.

“Digjitalizimi i shërbimeve doganore është një nga strategjitë më efikase në luftën kundër korrupsionit, që ka rritur transparencën ndaj qytetarëve dhe biznesit dhe ka reduktuar kohën për marrjen e shërbimeve. Sot dogana është pa dokumente, paperless,  e digjitalizuar në mbledhjen e detyrimeve dhe të ardhurave apo dhe në kontrollin e flukseve hyrëse dhe dalëse. Qytetarët dhe bizneset deklarojnë në sistemin informatik të doganave pa shkresa dhe marrin vërtetime apo shkresa online, lehtësisht nga platforma e-Albania. Digjitalizimi ka moderuar shërbimin doganor duke ofruar shumë cilësi shërbimi duke u përafruar me standardet e BE-së dhe ka sjellë uljen e kohë dhe kostos për biznesin”, deklaroi Gazheli.

Duke iu referuar statistikave, ai tha se, “falë digjitalizimit, koha e ç’doganimit është ulur me 50% në të gjithë territorin doganor shqiptar”, teksa bëri të ditur se për vitin 2021, doganat kanë dhënë 5 415 autorizime online duke kursyer 10 830 ditë pune për biznesin. Ndërsa gjatë periudhës janar-maj 2022, janë dhënë 3932 autorizime online duke kursyer 7964 ditë pune”.

Gazheli tha se, revolucioni digjital në sistemin doganor, është pjesë e vizionit të kryeministri Edi Rama “Shqipëria pa sportele”, çka ka sjellë shërbime më eficiente për qytetarin dhe biznesin dhe rritje të të ardhurave.

“Për vitin 2021 të ardhurat nga doganat u rritën në 193 miliardë USD, ndërsa të ardhura rekord pritet të shënohen në 2022,  me rreth 2 miliardë USD, tregues pozitiv këto që i adresohen digjitalizimit dhe shërbimet online”, u shpreh ai.

Sipas tij, Administrata Doganore është pjesë e nismës “Ballkani i Hapur” ndërsa ka nënshkruar dhe disa nisma me vendet e rajonit për t’i paraprirë lehtësimit të punës me biznesin dhe zhvillimit të tregtisë.

“Operatori Ekonomik i Autorizuar është një risi për frymën e biznesit, aplikoni për ta përfituar këtë regjim që doganat ia ofrojnë bizneseve që kanë qëndrueshmëri dhe potenciale zhvillimi. Ndërkohë që gjatë 2022, janë ulur me 7% procedurat doganore dhe procesimi në kanalin jeshil është rritur me 50%. Synojmë rritjen e të ardhurave dhe zhvillimin e strategjisë së ligjshme”, tha Gazheli.