Dogana Shqiptare merr vlerësimin pozitiv nga CEFTA për Validimin e Operatorëve Ekonomikë të Autorizuar (OEAS) (Publikuar dt. 10/06/2022)

Grupi i Validimit të CEFTA, nën mbikqyrjen e DG TAXUD të Bashkimit Europian, në fund të vlerësimit  disa ditor në Tiranë,  konkludoi se programi i Doganave Shqiptare për Operatorët Ekonomike të Autorizuar për Sigurinë dhe Mbrojtjen plotëson standardet e Protokollit Shtesë 5 të CEFTAs, duke marrë opinionin pozitiv.

Në aktivitetin e organizuar për këtë qëllim, me mbështetjen e Sekretariatit të CEFTAs, Drejtori i Përgjithshëm i Doganave Shqiptare, Genti Gazheli  vlerësoi se njohja reciproke e Operatorëve Ekonomikë të Autorizuar (OEAS) midis palëve anëtare të CEFTA-s do të sjellë lehtësi të madhe për operatorët që do të përfitojnë këtë status dhe shkëmbimet tregtare mes palëve.

Shqipëria, Maqedonia e Veriut dhe Serbia kanë tashmë marrëveshjet bilaterale të njohjes reciproke të OEAS në kuadër të nismës “Ballkani Hapur” dhe e njëjta marrëveshje është negociuar në nivel teknik edhe me Kosovën. Marrëveshja me Kosovën pritet të nënshkruhet në mbledhjen e përbashkët të dy qeverive që do të mbahet më 24 qershor 2022.

“Gjatë vitit 2021 kemi marrë aplikimet e para dhe kemi miratuar statusin për 8 Operatorë të Autorizuar Ekonomikë, kryesisht nga bizneset më të konsoliduara dhe më korrekte në marrëdhënien me Administratën Doganore. Interesi i 9 operatorëve të tjerë për të përfituar statusin e Operatorit Ekonomik të Autorizuar është tregues i rritjes së besimit te administrata doganore dhe faktit se avantazhet e OEA janë efikase”, tha Gazheli.