Open Ballkan, lehtësitë doganore rrisin tregtinë mes vendeve (Publikuar dt. 08/06/2022)

Lehtësimi i tregtisë mes vendeve të rajonit do të rrisë shkëmbimet tregtare dhe konkurrueshmërinë e ekonomive tona në tregjet europiane e globale.

Në kuadër të Open Ballkan, që po mbahet në Ohër të Maqedonisë së Veriut, Drejtori i Përgjithshëm i Doganave z. Genti Gazheli, zhvilloi një takim me drejtorin e Përgjithshëm të Doganave të Serbisë, z.Branko Radujko, ku diskutuan mbi bashkëpunimin mes dy administrative.

Z. Gazheli vlerësoi gjatë këtij takimi se mes Shqipërisë dhe Serbisë janë nënshkruar disa marrëveshje, një nga të cilat është edhe për njohjen reciproke të Operatorëve të Autorizuar Ekonomikë që mundëson lehtësira në eksportet dhe importet mes dy vendeve.

Për vitin 2021, volumi tregtar i shkëmbimeve me Serbinë ka qenë 505 293 Ton me një vlerë prej 37 936 mln lekë ose 309 mln Euro.

Kryesisht nga Shqipëria drejt Serbisë gjatë vitit 2021 janë eksportuar cimento, energji elektrike, elemente kimike, zarzavate të ndryshme, shufra dhe shkopinj te tjere prej gize, etj, ndërkohë janë importuar energji elektrike, misër, grurë, uje mineral.