Trajnime për punonjësit

Për punonjësit e rinj, Administrata Doganore në bashkëpunim me QTATD (Qendrën e Trajnimeve të Administratës Tatimore dhe Doganore) dhe ASPA-n (Shkollën Shqiptare të Administratës Publike), zhvillon trajnimin e detyrueshëm me qëllim përfitimin e njohurive bazë mbi Administratën Doganore, Shërbimin Civil, Kodin e Etikës, Sfidat e Integrimit Europian të Shqipërisë, Organizimin dhe Funksionimin e Adminitratës Shtetërore, etj.

Për punonjësit ekzistues, me qëllim përmirësimin profesional të tyre zhvillohen trajnime të vazhdueshme për përditësimin e njohurive në lidhje me ndryshimet në Legjislacionin Doganor, e më gjerë.

Trajnimi i vazhdueshëm është thelbësor për performancën individuale, zhvillimin personal dhe profesional, gjithashtu edhe për suksesin e Administratës Doganore.

Të mësuarit dhe puna janë të integruara në aktivitetin e çdo punonjësi, të cilët kanë mundësi të rrisin performancën e tyre me anë të programeve trajnuese që zhvillohen brenda dhe jashtë vendit. Në programet e trajnimeve të hartuara sipas nevojave, përfshihen tema nga fusha të ndryshme të administratës doganore, por edhe tatimore, për aftësimin profesional të personelit në vijim të ndryshimeve legjislative/proçedurave, etj., si dhe praktikat më të mira në shërbim të biznesit, ku synohet të mbulohen të gjitha fushat e aktivitetit të Administratës Doganore, lidhur me procedurat dhe detyrimet doganore, borxhin doganor, vlerën doganore, produktet e akcizës, Marrëveshjet e Tregtisë së Lirë që zbaton Shqipëria, etj.

Në realizimin e trajnimeve përdoret në një masë të gjerë ekspertiza e punonjësve tanë me njohuri dhe eksperiencë të thelluar në fushën doganore. Trajnimet zhvillohen në Drejtorinë e Përgjithshme të Doganave, si dhe në Degë Doganore.

Ndër vite, Administrata Doganore ka krijuar dhe vazhdon të krijojë marrëdhënie të frytshme me Institucione vendase si: Ministri të ndryshme si e Mjedisit, Energjitikës, Inovacionit, Mbrotjes, Brendshme etj., dhe ato ndërkombëtare si Organizata Botërore e Doganave, TAIEX, Projekti i Binjakëzimit IPA 2012, EXBS (Programin e Kontrollit të Eksporteve dhe Sigurisë Kufitare në Ambasadën Amerikane), etj.