Programi EXBS

Programi EXBS (Export Control and Related Border Security) për Kontrollin e Eksporteve dhe Sigurinë Kufitare ka qenë dhe vijon të jetë një nga partnerët kryesorë të Shërbimit Doganor Shqiptar në mbështetjen e përpjekjeve tona për përmirësimin e kontrollit të kufirit dhe parandalimin e lëvizjes së mallrave me risk, në mënyrë të veçantë të mallrave të përdorimit të dyfishtë dhe atyre radioaktive.

Në kuadër të këtij Programi, Administrata Doganore ka bashkëpunuar gjatë këtyre viteve falë asistencës së Keshilltarit Rajonal të EXBS-it z. Christopher J. Milam dhe znj.Vilma Guri, Koordinatore e Programit EXBS në Shqipëri.

Ky program ndër vite ka dhuruar për Administratës Doganore paisje të ndryshme sidomos për strukturat e përforcimit të ligjit si makina të reja për Antikontrabandën, sete inspektimi dhe çanta veglash për kontrollin e automjeteve në kufi, skanera për bagazhet në Degët kufitare, etj.

Gjithashtu EXBS ka kontribuar në rritjen e përfaqësimit të Shërbimit Doganor në aktivitetet ndërkombëtare (konferenca ndërkombëtare dhe aktivitete rajonale e ndërkombëtare trajnimi) me objekt kontrollin e mallrave të përdorimit të dyfishte, përfshi në mënyrë të veçantë ato për kontrollin e lëndëve radioaktive, si dhe ka organizuar ndër vite trajnime për stafin doganor

Trajnimet e zhvilluara me mbështetjen e Programit EXBS janë kryer duke trajtuar kryesisht tema si:

• Terrorizmi dhe armët e shkatërrimit në masë
• Ndërgjegjësimin e Përhapjes së Armëve të Shkatërrimit në Masë
• Targetimi i Menaxhimit te Riskut
• Analiza e imazheve me rreze x
• Ndërgjegjësimi ndaj Materialeve Kimike dhe Biologjike
• Përdorimin e mjeteve informatike të kontrollit
• Parandalimin e Kalimit të Paligjshëm të Mallrave Radioaktive dhe Bërthamore
• Bazat e kontrollit strategjik
• Trajnim për kapjen e mallrave kontrabandë në aeroporte
• Trajnim për pajisjet CT-40 dhe përdorimin e tyre
• Trajnim mbi përdorimin e pajisjeve të kontrollit
• Inspektim Kufitar i llojeve të ndryshme: persona apo automjete

Asistenca e Programit EXBS ka mundësuar:

Ndërgjegjësimin e personelit doganor për rëndësinë e kontrolleve të sigurisë në pikat e kalimit kufitar, përfshi këtu dhe të strukturave qendrore për planifikimin e aktiviteteve e investimeve që kontribuojnë për rritjen e kontrolleve të sigurisë në kufi.

Rritjen e bashkëpunimit me institucione të tjera të zbatimit të ligjit, si me Policinë e Kufirit, Autoritetin e Kontrollit Shtetëror të Eksporteve (AKSHE), Zyrën e Mbrojtjes nga Radiacioni dhe Institutin e Fizikes Bërthamore të Zbatuar, përmes rritjes së nr. te kontakteve, shkëmbimit te informacionit, nënshkrimit të MoU për bashkëpunim ndër-institucional dhe pjesëmarrjes aktive në procese që ndikojnë në rritjen e sigurisë për kufijtë e vendit.