Anijet e Peshkimit

Furnizohen me karburant (gazoil) për peshkim, pa paguar taksën e qarkullimit , taksën e karbonit dhe akcizën, por duke paguar TVSH-në, subjektet e peshkimit (personat juridikë dhe fizikë) me destinacion përdorimi anijet e peshkimit, të cilat kanë marrë statusin e pritësit të regjistruar dhe plotësojnë kushtet e përcaktuara në legjislacionin për Akcizat.

Do të furnizohen me karburant pa akcizë të gjitha anijet e peshkimit, persona juridikë dhe fizikë, të cilët:

• janë të pajisur me licencë peshkimi;
• janë të regjistruar pranë organeve tatimore dhe shesin prodhimin e tyre me faturë tatimore me TVSH. Vlera totale e karburantit të furnizuar (konsumuar) gjatë një 6-mujori nuk mund të jetë më e madhe se 80% e vlerës totale të produktit të peshkimit të shitur me faturë tatimore me TVSH, gjatë kësaj periudhe;
• janë të regjistruar në regjistrin detar dhe në regjistrin e flotës së peshkimit;
• janë të siguruar sipas ligjit për sigurimin e detyrueshëm në sektorin e transportit, pas miratimit të tarifave përkatëse të sigurimit nga autoriteti kompetent;
• kanë të punësuar dhe të regjistruar për kontributet e sigurimeve shoqërore dhe shëndetësore një numër jo më pak se:

i) (dy) persona për anijet deri në 15 metra gjatësi;
ii) (tre) persona për anijet mbi 15 metra deri në 24 metra gjatësi;
iii) (katër) persona për anijet mbi 24 metra gjatësi.
dh) janë subjekte aktive të regjistruara, të cilat nuk kanë detyrime ndaj organeve tatimore dhe doganore.

Procedura

Për të përfituar nga përjashtimi, operatoret e interesuar, duhet fillimisht të aplikojnë në Degën e Doganës Mbikqyrëse për Autorizim për Statusin e Pritësit të Regjistruar.

Pas marrjes së statusit “Pritës i Regjistruar” subjektet përfituese të përjashtimit, aplikojnë pranë autoritetit doganor, duke paraqitur dokumentacionin e mëposhtëm:

• Të dhëna për sasinë dhe cilësinë e produktit të akcizës për t’u përjashtuar;
• Konfirmimin zyrtar nga autoritetet përgjegjëse për peshkimin për plotësimin e kushteve të parashikuara më sipër. Në rastet e mosplotësimit të kushteve të sipërpërmendura, për faturimin e shitjeve me TVSH në masën e përcaktuar, nuk kryhet asnjë veprim pa shlyer më parë shumën e detyrimit korrespondues, të llogaritur sipas këtij kushti;
• Kopjen e kontratës së shitblerjes me depozituesin e miratuar që disponon produktin e akcizës.
  Autoriteti doganor, brenda 7 (shtatë) ditësh, miraton ose refuzon autorizimin për përjashtimin sipas formularit të përcaktuar bashkëlidhur.

Përfituesi i përjashtimit i paraqet depozituesit të miratuar apo administratorit të magazinës doganore/të lirë autorizimin e përjashtimit.

Depozituesi i miratuar/përfaqësuesi fiskal, bazuar në autorizimin e përjashtimit të përfituesit harton dokumentin DSHA për lëvizjen nën pezullim në adresë të pritësit të regjistruar.

Për produktet e akcizës të përjashtuara, depozituesi i miratuar ka detyrimin që të identifikojë me denatyrues (ngjyrues dhe shënjues) produktet e përjashtuara.

Përfituesi i përjashtimit merr në dorëzim produktin e shoqëruar me dokumentin DSHA.