Transporti ajror dhe detar brenda Republikës së Shqipërisë

Kontrollet ose formalitetet doganore zbatohen për bagazhet e dorës dhe bagazhet e hambarit të personave që kryejnë një udhëtim ajror ose detar brenda Republikës së Shqipërisë, vetëm kur legjislacioni doganor i parashikon këto kontrolle ose formalitete. Këto kontrolle zbatohen pa cënuar asnjë prej rasteve të mëposhtme:

• kontrollet e sigurisë dhe mbrojtjes;
• kontrollet lidhur me ndalimet ose kufizimet.

Drejtori i Përgjithshëm i Doganave nxjerr aktet nënligjore që përcaktojnë masat që sigurojnë zbatimin uniform të kontrolleve doganore, përfshirë shkëmbimin e informacionit mbi riskun dhe mbi rezultatet e analizave të riskut, kriteret dhe standardet e përbashkëta të riskut, masat e kontrollit dhe fushat prioritare të kontrollit.

Portet dhe aeroportet, zbatojnë kontrollet dhe formalitetet doganore për:

Bagazhet e dorës dhe bagazhet e hambarit të personave që:

• i) udhëtojnë me një avion, i cili vjen nga një aeroport jashtë Republikës së Shqipërisë dhe që, pas një ndalese në një aeroport shqiptar, vazhdon fluturimin drejt një aeroporti tjetër shqiptar;
• ii) udhëtojnë me një avion, i cili ndalon në një aeroport shqiptar përpara se të vazhdojë fluturimin drejt një aeroporti joshqiptar;
• iii) përdorin një shërbim detar që ofrohet nga i njëjti mjet lundrimi dhe përfshin ndalesat e njëpasnjëshme që nisen nga, vazhdojnë ose përfundojnë në një port joshqiptar;
• iv) janë në bordin e një mjeti për turizëm ose mjeti fluturimi biznesi;

Bagazhet e dorës dhe bagazhet e hambarit që:

• i) mbërrijnë në një aeroport shqiptar në bordin e një avioni që vjen nga një aeroport joshqiptar dhe transferohen në aeroportin shqiptar në një avion tjetër që vazhdon një fluturim kombëtar;
• ii) ngarkohen në një avion në një aeroport shqiptar, duke vazhduar me një fluturim kombëtar, për t’u transferuar në një avion tjetër në një aeroport tjetër shqiptar me destinacion një aeroport joshqiptar.