Aplikim për Veprim në Doganë

Administrata Doganore Shqiptare në kuadër të misionit fiskal, ekonomik dhe mbrojtës ka për detyrë, mbrojtjen e të drejtave të Pronësisë Intelektuale me qëllim:

• Mbrojtjen e ambientit të bizneseve të cilët janë mbajtës dhe/ose përdorues të një të drejte të Pronësisë Intelektuale nga konkurrenca e pandershme;
• Mbrojtjen e konsumatorit dhe shëndetit publik nga mallra të falsifikuara/pirate për pasojat që shkaktojnë dhe kufizimin e mundshëm të humbjeve të të ardhurave në buxhetin e shtetit, që vinë si pasojë e mallrave që cenojnë një të drejtë të Pronësisë Intelektuale.

Për të mundësuar një mbrojtje të së drejtave të Pronësisë Intelektuale, si dhe për të arritur të njëjtin nivel mbrojtjeje për çështjen e Pronësisë Intelektuale, si në vendet e Bashkimit Evropian, pranë Sistemit Doganor është krijuar Drejtoria për Mbrojtjen e Pronësisë Intelektuale, e cila është strukturë përbërëse e Departamentit Operativ – Hetimor pranë Drejtorisë së Përgjithshme të Doganave.

Objekti i punës së DMPI-së është të zbatojë legjislacionin për Mbrojtjen e Pronësisë Intelektuale sipas ligjeve dhe akteve nënligjore në fuqi për territorin Doganor Shqiptar, të koordinojë punën ndërmjet Drejtorive të tjera të Drejtorisë së Përgjithshme të Doganave, institucioneve të treta dhe/ose grupeve të interesit për çështjet e Pronësisë Intelektuale, të administrojë me profesionalizëm aplikimet për veprim të paraqitura pranë D.M.P.I-së, duke mbajtur në vëmendje respektimin e afateve kohore, procedurale dhe trajtimin e çështjeve në mënyrë profesionale.

Aplikimi për veprim është i vetmi instrument mbrojtës për të mbrojtur të drejtat e pronësisë intelektuale nga Administrata Doganore Shqiptare.

Ky aplikim paraqitet pranë Drejtorisë së Përgjithshme të Doganave, me anë të dokumenteve të mëposhtëm:

• Formularët specifikë për këtë qëllim bashkëlidhur duhet të jenë në tre kopje (një për aplikuesin dhe dy për Drejtorinë e Përgjithshme të Doganave).
• Dokumente që vërtetojnë se aplikuesi ka të drejtë të paraqesë aplikimin;
• Kur aplikuesi paraqet aplikimin me anë të një përfaqësuesi, detajet e personit që e përfaqëson dhe provën se personi ka kompetenca të veprojë në cilësinë e përfaqësuesit, në përputhje me legjislacionin në fuqi.

Procedura standarde që ndiqet nga Administrata Doganore (Drejtoria për Mbrojtjen e Pronësisë Intelektuale) për miratimin/refuzimin e një Aplikimi për veprim paraqitet në diagramën e mëposhtme: