Forum biznesi me DHAT- Gazheli : Përmirësuam shërbimin doganor, lehtësuam procedurat

Drejtori i Përgjithshëm i Doganave, Gent Gazheli  zhvilloi një takim me bizneset e Dhomës Amerikane të Tregtisë, ku siguroi për lehtësimin më tej të procedurave për biznesin.

Në fjalën e tij Gazheli u shpreh,  se gjatë periudhës 2013-2019 shënohet një rritje e të ardhurave me 18%, nga të cilat, të ardhura nga taksa doganore janë rritur me 12%, nga akciza me 28% dhe nga TVSH me 22%.

Sipas Gazhelit, arsyet kryesore të rritjes së të ardhurave në dogana është formalizimi i ekonomisë, lufta kundër kontrabandës dhe evazionit fiskal, si dhe ndërgjegjësimi i operatorëve ekonomike.

Ndër prioritetet për këtë vit, Gazheli renditi krijimin e lehtësirave për biznesin dhe qytetarët nëpërmjet ofrimit të shërbimit në kohë dhe me cilësi, duke shmangur vonesat dhe burokracitë e panevojshme, menaxhimin e problematikave të biznesit gjatë krizës COVID-19 dhe rritja e të ardhurave doganore.

Sipas Gazhelit, roli i Administratës Doganore është mjaft i rëndësishëm dhe kyç në krijimin e klimës së favorshme për biznesin, ndaj, shtoi ai, kemi krijuar një sërë lehtësirash për ta.